طرق استعادة قناة اليوتيوب المخترقة

اليوم سوف نتعرف علي طرق استعادة قناة اليوتيوب المخترقة, وكيف تتجنب الاختراق من أساسه, ولو لا قدر الله ده حصل ايه هي الاحتياطات اللي انت محتاج تكون واخدها علشان تقدر تستعيد القناة والحسابات في أقرب وقت.

خلينا نبدأ بـ حادثة القرصنة :

كل الاختراقات اللي رصدناها لحد دلوقتي حصلت بطريقة من اثنين والاثنين بيستخدموا الهندسة الاجتماعية في اختراق الحسابات :

الطريقة الأولي :

أول طريقة هي ان الهاكر بيتواصل معاك عن طريق الإيميل او الواتساب او التليجرام ويطلب منك عمل اعلان لتطبيق او برنامج علي قناتك نظير مبلغ من المال, وبطلب منك لاحقا انك تحمل التطبيق علي جهازك.

التطبيق بيكون ملغم وبمجرد تحميل التطبيق علي الكمبيوتر بيتم اختراق حساباتك.

والطريقة دي أصبحت قديمة لأنها تحتاج قاعدة بيانات وايميلات ورسائل الخ… اما الطريقة الثانية فانت بتاخد القاضية في لكمة واحدة وبدون سابق انذار.

الطريقة الثانية :

الطريقة الثانية تبدأ من عندك وانك تكون بتدور علي كراك لبرنامج مونتاج, وبعدين توصل لفيديو علي اليوتيوب بيشرح لك الكراك وطريقة استخدامه وبيقدم لك رابط تحميل الكراك علي طبق من ذهب في وصف الفيديو.

وانت طبعآ بتحمل الكراك وبمجرد تشغيله علي الكمبيوتر بيتم اختراق حساباتك.

الاختراقات مش بتتم في نفس اللحظة, وغالبا بتكون خلال 24 ساعة من تشغيل الكراك. فلو انت بتتفرج علي الفيديو ده وسطبت اي كراك خلال الـ 24 ساعه اللي فاتوا, فانت معرض ان حساباتك يتم اختراقها في أي لحظة.

القنوات بيتم اختراقها ازاي ؟

القنوات بيتم اختراقها أو قرصنتها عن طريق سحب ملفات الارتباط Cookies من جهازك وارسالها للهاكر,

الكوكيز لمن لا يعرفها هي ملفات مرتبطة بمتصفح الانترنت وتحتوي علي تفاصيل دخولك للحسابات زي اسم المستخدم وكلمة السر وبيانات المتصفح والموقع الجغرافي,,, الخ,

وإذا تم الوصول اليها من قبل الهاكر ونسخها فإنه يتمكن من تسجيل الدخول لحسابك في جوجل وكأنه أنت, وبالتالي الوصول الي حساباتك المرتبطة بـ جوجل مثل اليوتيوب وأدسنس وغيرها من حسابات المواقع الأخرى مثل الفيس بوك والحسابات البنكية.

والهاكر بيبدأ نشاطه بتغيير بيانات تسجيل الدخول للحساب ومنعك من الوصول ليه وكمان بيعمل لك تسجيل خروج من كل اجهزتك المتصلة بالجساب. وبيغير كلمة السر, ورقم تليفون الاسترداد  والايميل الاحتياطي وايميل الاسترداد.

ومش بس كده, لأ كمان بعد ما بيغير بيانات الدخول للحساب, بيشفر الحساب باستخدام Security Key وبيغير الرموز الاحتياطية علشان ماتقدرش توصل للحساب من تاني.

وخليني أصدمك واقول لك إن 70% من الناس اللي قنواتهم بتتسرق مابيعرفوش يرجعوها ازاي, وبيروح منهم شقا سنين في لحظة, وعلشان كده مهم تشارك الفيديو ده مع الناس اللي تعرفهم من اليوتيوبرز تحديدآ ومنشئي المحتوي والناس اللي مهتمه بأمن المعلومات الرقمية.

وقبل ما اقول لك ازاي تقدر ترجع القناة لو اتسرقت خلينا الأول نفهم أيه اللي بيحصل في القناة بعد اختراقها ؟

ماذا يحدث للقناة بعد اختراقها ؟

الهدف الأساسي من اختراق القنوات بهذه الطريقة هو عمل بث مباشر للترويج للعملات الرقمية, وغالبا ما يحتوي البث المباشر علي فيديوهات لرجل الأعمال ايلون ماسك وحوار مزيف بيدور معاه عن الترويج لعملة رقمية موجوده بالفعل أو الترويج لاكتتباب جديد لعملة سوف يتم طرحها,

قرصنة القنوات باختصار هي شكل من أشكال اعلان الهاكرز عن أنفسهم, سواء بالترويج لعملات رقمية بيمتلكوها ويحققوا من خلالها مكاسب, أو باختراق حسابات المشاهير والمؤثرين والاستيلاء علي اموالهم.

القناة بعد اختراقها بيتغير اسمها وبتتغير صورة الغلاف والفيديوهات بتاعتك بتتحذف أو بتتغير الخصوصية بتاعتها, وبعدها بتبدأ حفلة البث المباشر للعملات الرقمية.

واللي غالبا بعدها بساعات القناة بتاخد مخالفة سياسات وبتتقفل وتتحذف من اليوتيوب. وتلاقي نفسك في ورطة. لا انت عارف تدخل علي حساب جوجل, ولا القناة اصلا أصبحت موجودة.

كيف تتصرف في حالة اختراق قناة اليوتيوب ؟

بداية عليك التزام الهدوء وإدراك أن الكارثة قد وقعت بالفعل وأن قناتك وحسابك علي جوجل تم اخترقهم, ولكي تتجاوز الأزمة عليك اتباع الخطوات التالية :

1- إذا كان لديك شك أن الفيروس ما زال علي الجهاز, عليك أن تقوم بحذف الفيروس وكذلك حذف الـ Cookies لآخر 48 ساعة أو لأقرب وقت قبل اختراق الحساب.

استعين بهذا المقالات لمعرفة كيفية تنظيف الـ Cookies :

• How to clear cache and cookies on Windows PC
• Clear cache & cookies with Google

2- عليك محاولة استعادة حسابك علب جوجل باستخدام أي من طرق الدخول التالية إذا توفرت:

• كلمة السر.
• رقم تليفون الاسترداد.
• البريد الاحتياطي.
• بريد الاسترداد.
• الرموز الاحتياطية.
• تطبيق Google Authenticator إن وُجد.

وعليك بتجربة هذه المحاولات من كل الأجهزة التي كنت تقوم بالتسجيل من خلالها, سواء موبايل او كمبيوتر أو لا بتوب.

وإذا فشلت في استعادة القناة بأي من الطرق السابقة عليك الانتقال للخطوة الثالثة.

3- اليوتيوب محتاج ضامن :

إذا كُنت تمتلك أو متاح لك استخدام حساب جوجل آخر يحتوي علي قناة علي اليوتيوب بها أكثر من 10 الاف مشترك, انتقل الي نموذج استعادة القناة. وإن لم يتوفر لك ذلك انتقل الي الخطوة رقم 4.

4- قم بإنشاء حساب جوجل جديد وتأمينه من الاختراق.

5- قم بالتواصل مع فريق دعم اليوتيوب علي تويتر,

وأخبرهم بأن قناتك تم اختراقها وأنك لا تستطيع الدخول الي نموذج التواصل مع الدعم الفني لاستعادة القناة. واعطهم اسم البريد الالكتروني الجديد الذي أنشأته. بعدها سوف يقوم دعم اليوتيوب علي تويتر باعطاءك صلاحيات الدخول الي نموذج استعادة القناة بشكل إستثنائي.

نموذج استعادة قناة اليوتيوب :

نموذج استعادة قناة اليوتيوب هو نموذج خصصته إدارة اليوتيوب لأصحاب القنوات التي تمت قرصنتها لمساعدتهم في استعادة قنواتهم, ولكن بشرط وجود وسيط أو ضامن, وذلك عن طريق الاستعانة بقناة يوتيوب بها عدد مشتركين أكثر من 10 الاف مشترك لكي تتمكن من استخدام النموذج أو فتح دردشة مع الدعم الفني.

وفي حالة عدم توفر ذلك عليك التواصل مع فريق الدعم علي تويتر كي يعطيك صلاحيات الوصول الي النموذج كما أسلفنا في الذكر. أو إستخدام الرابط الموجود في هذه الصفحة ” قنوات التواصل مع دعم جوجل “

البيانات المطلوبة لاستعادة القناة المخترقة :

نموذج استعادة قناة اليوتيوب يتطلب استكمال بعض البيانات كي تتأكد إدارة اليوتيوب أنك مالك الحساب أو مالك القناة وهذه البيانات هي :

• صورة اثبات الهوية لمالك القناة.
• وصف دقيق لتفاصيل اكتشاف الاختراق:
  • لماذا تعتقد ان قناتك تم اختراقها ؟
  • ماذا حدث؟
  • متي حدث بالتاريخ والساعة؟
  • كيف اكتشفت اختراق قناتك؟
  • ماذا فعلت بعدها؟
  • هل تم تغيير محتوي القناة او إضافة محتوي جديد ؟
• رابط القناة التي تم اختراقها ويحتوي علي عنوان الـ Channel ID.
• ما هو البريد الالكتروني المرتبط بالقناة وهل مازال متاح لك الدخول اليه ؟
• الاسم الأول والاسم الأخير لصاحب الحساب.
•  رقم تليفون الاسترداد.
• اخر توقيت تسجيل دخول للقناة.
• رابط اخر فيديو تم رفعه علي القناة.
• أنواع وأسماء الأجهزة التي كانت تستخدم للدخول علي القناة. ” مثلا موبايل Oppo / لابتوب HP “
• رقم الايبي لاحد أماكن الاتصال بالإنترنت والتي استخدمت مسبقا للدخول الي القناة.
• رقم الناشر في حساب ادسنس المقترن بالقناة ان وجد.

هذه هي البيانات المطلوبة لاستكمال النموذج, وللأسف أغلب اليويتوبرز بيكون صعب بالنسبة لهم الوصول لأغلبها, مثل عنوان الناشر في ادسنس و الـ Channel ID و تاريخ انشاء القناة, ورقم الأيبي, وغيرها وهنا حتحتاج تستعين بمتخصص يساعدك في استكمال النموذج.

الملفات المطلوبة لاستعادة القناة :

في نهاية نموذج استعادة القناة سوف يطلب منك وصفك لتفاصيل اختراق القناة, وارفاق بعد لقطات الشاشة التي تثبت صحة كلامك وهي:

• صورة اثبات الهوية ويفضل جواز سفر أو بطاقة رقم قومي سارية.
• لقطات للشاشة Print Screen لمحاولات دخولك للحساب والرسائل التحذيرية التي تظهر لك. ويفضل أن يكون امتداد ملفات الصور هو JPG.
• لقطات للشاشة للتغيرات التي طرأت علي القناة أو الرسائل التي وصلتك بخصوص اشعارات الأمان وقت اختراق القناة.

كًل الملفات دي بتجمعها في ملف مضغوط باسم قناتك وبامتداد ZIP, وبترفقه مع النموذج.

أول رد من الدعم الفني لليوتيوب :

لو كانت كل بيانات النموذج سليمه حيوصل لك الرد من الدعم الفني خلال 24 ساعة, وغالبا القنوات بيتم اختراقها ما بين الساعه 2 مساء الي 10 مساء بتوقيت مصر, ولو انت استكملت النموذج قبل الفجر, الرد بيوصل لك علي الساعه 10 الصبح وبيكون رسالة زي اللي في الصورة.

بيقولوا لك في الرسالة انهم تأكدوا ان القناة تم اختراقها وأرسلوا لك طريقتين تحاول من خلالهم تستعيد القناة, وغالبا مفيش ولا طريقه منعم حتنفع الا لو جربتها من جهاز لم يصاب بالفيروس وكنت تقوم بتسجيل الدخول من خلاله سابقآ.

مهم جدآ تتأكد انك جربت الطريقتين علي كل الأجهزة اللي كنت تستخدمها لتسجيل الدخول, مع الاخذ في الاعتبار ان الطريقة الأولي المرتبطة بالـ Cookies مش حتحتاج منك تعمل Clear للـ Cookies من الأجهزة السليمة, فقط اعملها مع الجهاز اللي تم اختراقه, ده بيزود احتمالية استعادة القناة في المرحلة دي.

ولو المحاولات كلها فشلت حترد علي رسالة للدعم برسالة زي اللي في الصورة, وتكتب فيها البريد الالكتروني اللي استخدمته لاسترداد الحساب في الطريقة الثانية.

مبروك عليك استعادة القناة :

خلال 12 ساعة أو 24 ساعة علي اقصي تقدير حيوصل لك بريد الكتروني جديد من الدعم الفني, فيه رابط صالح للاستخدام لمدة 7 أيام, ومتاح استخدامه فقط من خلال البريد الالكتروني اللي انت ارسلته.

تقدر من خلال الرابط ده انك تستعيد قناتك من تاني.

وكمان في البريد الالكتروني بيكون في إجراءات تأمين القناة والحساب بعد استعادتهم.

إزاي تتجنب قرصنة قناتك علي اليوتيوب ؟

علشان تتجنب اختراق قناتك علي اليوتيوب فانت محتاج تتبع مجموعة خطوات :

1- ابعد تمامآ عن استخدام اي كراكات أو برامج مجهولة أو تجريبية علي جهازك الاساسي اللي انت مسجل من خلاله دخول لحساب المالك لقناتك علي اليوتيوب.

2- تستخدم كلمة سر صعيه مافيهاش اسم او تاريخ ميلاد او رقم تليفون, ويكون في كلمة السر ارقام وحروف.

3- تتأكد من انك متاح ليك الوصول الي بيانات استرداد الحساب والايميل الاحتياطي.

4- تتأكد من ان معاك الرموز الاحتياطية للحساب في مكان آمن أو ملف مضغوط علي الكمبيوتر بكلمة سر.

5- تفعل الدخول بخطوتين علي Google Authenticator أو Security Key.

6- تستخدم برنامج كويس مضاد للفيروسات.

7- تحتفظ بالبيانات المهمة عندك في File لأنك حتحتاجها لو لاقدر الله والقناة اتهكرت, والبيانات دي هي :

• الاسم الاول المالك لحساب جوجل.
• الاسم الاخير.
• البريد الالكتروني.
• بيانات ايميلات وتليفونات الاسترداد.
• رابط قناتك علي اليوتيوب ولابد ان يحتوي الرابط علي معرف القناة.
• رقم الناشر في حساب ادسنس.
• تاريخ انشاء حساب جوجل وتاريخ انشاء القناة.

بس خلاص,

لو حابب تعرف أكتر عن الخدمات اللي بنقدمها بخصوص استعادة وتأمين الحسابات تقدر تزور الرابط ده ” خدماتنا “