اكبر مشكلة قابلتني في مشروعي كانت تحديد الشريحة المستهدفة.
أينعم كان في مشاكل كتير تانية, ولكن الشريحة المستهدفة من وجهة نظري كانت المشكلة الأكبر في بداية المشروع.
مفيش تسويق من غير فهم وتحليل الشريحة المستهدفة.
ومفيش مشروع بيبدأ من غير خطة تسويق.
التدوينة دي علشان أشارك مع حضرتك ازاي حليت أكبر مشاكلي في التسويق.
مش ح أتكلم كتير عن الرحلة بس ح اعطيك الخلاصة.
90% من الناس اللي شاركت معاها الموضوع ده علي التليجرام او الفيس بوك, حاليا انا اقدر اوصل لهم بشكل مباشر عن طريق الواتساب, او الإيميل, ومش معتمد كتير علي ميتا ولا جوجل علشان تكون وسيط بيني وبينكم.
أنا حرفيا أعرف كتير من حضراتكم.
صاحب الشركة ورائد الاعمال واليوتيوبر والظابط والطيار والطالب والحوت والعالمي والمستثمر وربة المنزل والـ Makeup Artist والمونتير والمذيع والصحفية وصاحب راس المال والعامل وسواق التكتوك والمنشد والملحن والأستاذ والدكتور وصاحب معمل التحاليل والمستثمر العقاري والـ Broker وووووو حدث الي مالا نهاية.
الناس دي كلها كانت بتتابعني, بس مفيش وسيلة تواصل مباشرة بينا وبين بعض, وبالتالي كان علشان اوصل لهم انا باكون محتاج لـ جوجل او يوتيوب او تليجرام او الفيس.
ومفيش اي منصة من دول بتعطيني صلاحيات مباشرة للوصول الي البريد الالكتروني والايميل الخاص بالمتابعين.
حتي منصة Udemy , مش بتعطيك معلومات كافيه عن المتدربين, وكمان سهل اختراقها.
بالإضافة الي ان اللي تابعوني علي اليوتيوب او الفيس من 5 سنين اتفرقوا, منهم اللي اهتمامه اصبح تيك توك, ومنهم اللي كبر, ومنهم اللي فهم, الخ..
النهارده انا قدرت ابدأ بشريحة مستهدفة عددها 1000 مش مليون ولا 10 مليون.
الـ 1000 دول يكفوني وبزيادة علشان ابني عليهم نموذج العمل اللي ح استخدمه بإذن الله في مشروع المصفوفة خلال الـ 10 شهور الجايين.
في الشريحة المستهدفة, مُش مهم العدد بقدر ما هو مهم, مين اللي موجود في الـ List
العدد كده كده سهل يتوصل له بالفلوس عن طريق الاعلانات او بالتحايل علي القانون والسياسات زي الحيتان.
شغلي في خطوط الإنتاج والاستيراد والتصدير, اتعلمت منه اني مش محتاج اكثر من 5 مستثمرين في السنة علشان انفذ 5 مصانع واشغل 3 شركات.
شغلي كاستشاري علمني ان الـ 2000 دولار ممكن ييجوا في يوم لو فاهم ومخطط صح وعندك خطة تنفيذ.
شغلي مع الـ Infulencers علمني ان اسهل شئ ممكن تحصل عليه هو الترافيك والفلوس, بس اصعب شئ ممكن تقتنيه هو التقدير والاحترام.
الشريحة المستهدفة اللي معايا حاليا هي اللي كنت بادور عليها من 2018 من وقت مكتب الهرم وبعده جراج المصفوفة.
7 سنين علشان افهم الشريحة المستهدفة, وشهرين علشان أأسس قاعدة البيانات و الـ CRM
—
الرسالة دي كان مهم أوصلها للناس اللي تهمني وانت واحد منهم.
ما تيأسش لو ما وصلتش لأهدافك, وما تتضايقش لو حسيت انك مش عارف تحدد اهدافك.
الأهداف بدون مبادئ وقيم هي أهداف مُغتصبة لذتها لحظة وألمها سنين.
اسمع لاي حد يكلمك عن تنظيم الوقت او التسويق بس ماتصدقش الكل لأن اغلبهم صنايعية يوتيوب بيكتبوا سكريبت كويس وبيعرفوا يعملوا فيديو يتشاف.
زي البنت اللي دايما Full Makeup علشان تداري وشها الحقيقي.
أهلا بيكم في #المصفوفة
لو جابب تنضم للشريحة المستهدفة شرفني علي الواتساب وعرفني بنفسك من هنا